ԱՄՆ-ում ՀՀ դեսպանն ու ԵԱՀԿ Մինսկի խմբի համանախագահը քննարկել են ԼՂ-ում լարվածության աճը

ԱՄՆ-ում ՀՀ դեսպան Լիլիթ Մակունցը Լեռնային Ղարաբաղում Ադրբեջանի ապակայունացնող գործողությունների մասին մարտի 25-ին զրուցել է ԵԱՀԿ Մինսկի խմբի ամերիկացի համանախագահ Էնդրյու Շոֆերի, ինչպես նաև կոնգրեսականներ Ֆրենք Փալոնի և փոխնախագահ Ադամ Շիֆի հետ։

Ինչպես հայտնում են ԱՄՆ-ում Հայաստանի Հանրապետության դեսպանությունից՝ դեսպան Մակունցը և ԵԱՀԿ Մինսկի խմբի ամերիկացի համանախագահ Էնդրյու Շոֆերը քննարկել են Լեռնային Ղարաբաղում լարվածության աճն ու զարգացումները, գազի մատակարարման խաթարման արդյունքում առաջացած հումանիտար խնդիրները։

Մարտի 25-ին Լիլիթ Մակունցը հեռավար հանդիպում է ունեցել նաև Կոնգրեսի հայկական հանձնախմբի համանախագահ Ֆրենք Փալոնի և փոխնախագահ Ադամ Շիֆի հետ։

Դեսպան Մակունցը կոնգրեսականներին է ներկայացրել Ադրբեջանի ապակայունացնող գործողությունները, մասնավորապես՝ մարտի 24-ին Արցախի Փառուխ գյուղ ներխուժումը, ինչպես նաև Լեռնային Ղարաբաղում կենսական նշանակություն ունեցող ենթակառուցվածքների բնականոն աշխատանքի խաթարումը, ինչը հանգեցրել է հումանիտար ճգնաժամի։

Դեսպան Մակունցն ընդգծել է միջազգային հանրության, այդ թվում ԱՄՆ-ի հստակ արձագանքի անհրաժեշտությունը և կարևորել ԵԱՀԿ Մինսկի խմբի համախագահության դերը ԼՂ հիմնախնդրի կարգավորման գործում։

Մարտի 24-ին ադրբեջանական կողմը, խախտելով շփման գիծը, առաջ է շարժվել Արցախի արևելյան հատվածում և իր վերահսկողության տակ առել Փառուխ գյուղը՝ վտանգ ստեղծելով նաև Խրամորթ գյուղի համար, որտեղից կանայք և երեխաները տարհանվել են։

Մարտի 24-25-ին Փառուխի hարակից կարևոր բարձունքների համար մարտերում հայկական կողմը տվել է երեք զոհ, վիրավորվել է 14 մարդ։ Ըստ Արցախի ՊԲ-ի՝ ադրբեջանցիները հինգ զոհ են տվել մարտերում։

Ադրբեջանցիներին ելման դիրքեր վերադարձնելու՝ ռուս խաղաղապահների միջնորդությամբ բանակցությունները մինչ այժմ արդյունք չեն տվել։

The post ԱՄՆ-ում ՀՀ դեսպանն ու ԵԱՀԿ Մինսկի խմբի համանախագահը քննարկել են ԼՂ-ում լարվածության աճը appeared first on CIVILNET.

#աշխարհ #արցախ #թոփ #լրահոս #հայաստան #քաղաքականություն #ադրբեջան #ղարաբաղ #մակունց #մակունցհամանախագահ #շոֆեր

Դեսպան Մակունցը հանդիպել է ԱՄՆ-ում հայրապետական այցով գտնվող Ամենայն Հայոց Կաթողիկոսի հետ

#լուրեր #քաղաքական #ամենայնհայոցկաթողիկոս #ամնումհհդեսպանություն #մակունց

Մակունցը ԱՄՆ պետքարտուղարի փոխտեղակալին ներկայացրել է սահմանին տիրող իրավիճակը

ԱՄՆ-ում Հայաստանի դեսպան Լիլիթ Մակունցը հեռախոսազանգ է ունեցել Միացյալ Նահանգների պետքարտուղարի՝ Եվրոպական ու եվրասիական հարցերով գլխավոր փոխտեղակալ Դերեք Հոգընի հետ, հաղորդում է ԱՄՆ-ում ՀՀ դեսպանությունը։

«Հեռախոսազանգի ընթացքում դեսպանը ներկայացրել է Ադրբեջանի զինուժի ռազմական ագրեսիայի հետևանքով ՀՀ սահմաններում տիրող իրավիճակը: Դեսպան Մակունցը շեշտել է միջազգային հանրության անհապաղ թիրախային կոչերի անհրաժեշտությունը՝ դատապարտելու Ադրբեջանի կողմից ձեռնարկված ռազմական գործողությունները ՀՀ ինքնիշխան տարածքի նկատմամբ»,- ասված է հայտարարությունում։

Նոյեմբերի 16-ին՝ ժամը 13։00-ի սահմաններում, ադրբեջանական զինված ուժերի ստորաբաժանումները հարձակում են գործել հայ-ադրբեջանական սահմանի արևելյան ուղղությամբ տեղակայված հայկական դիրքերի վրա։ Հայկական կողմն ունի երկու մարտական դիրքի կորուստ։

Ազգային ժողովի արտաքին հարաբերությունների հանձնաժողովի նախագահ Էդուարդ Աղաջանյանը «Ազատություն» ռադիոկայանի հետ հարցազրույցում ասել է, որ ադրբեջանական հարձակման հետևանքով հայկական կողմն ունի 15 զոհ։ Պաշտպանության նախարարությունն էլ հայտնել է 12 զինծառայողի գերեվարվման մասին։

The post Մակունցը ԱՄՆ պետքարտուղարի փոխտեղակալին ներկայացրել է սահմանին տիրող իրավիճակը appeared first on CIVILNET.

#աշխարհ #լրահոս #հայաստան #քաղաքականություն #ամն #մակունց #սահման

Հայաստանն ԱՄՆ-ում նոր դեսպան ունի

Նախագահ Արմեն Սարգսյանի հրամանագրով Լիլիթ Մակունցը նշանակվել է Ամերիկայի Միացյալ Նահանգներում Հայաստանի դեսպան։

«Հիմք ընդունելով վարչապետի առաջարկությունը` համաձայն Սահմանադրության 132-րդ հոդվածի 1-ին մասի 2-րդ կետի. Լիլիթ Մակունցին նշանակել Ամերիկայի Միացյալ Նահանգներում Հայաստանի Հանրապետության արտակարգ և լիազոր դեսպան՝ չորս տարի ժամկետով (նստավայրը՝ Վաշինգտոն)»,- ասվում է հրամանագրում։

Լիլիթ Մակունցը ծնվել է 1983-ի նոյեմբերի 7-ին Երեւանում: 2003-ին ավարտել է Երեւանի պետական համալսարանի ռոմանագերմանական բանասիրության ֆակուլտետը, 2005-ին՝ նույն ֆակուլտետի մագիստրատուրան:

Բանասիրական գիտությունների թեկնածու է: Մասնակցել է Թաֆթս համալսարանի Ֆլեթչերի ամառային դպրոցի դասընթացին, նշված է Parliament.am կայքի նրա կենսագրականում:

2005-ից դասավանդում է Հայ-ռուսական համալսարանում: 2016-ից պայմանագրային հիմունքով աշխատում է ԱՄՆ Խաղաղության կորպուսում:

2018-19 թթ․ Մակունցը եղել է ՀՀ մշակույթի նախարար։ «Քաղաքացիական պայմանագիր» կուսակցության անդամ է:

2018-ի դեկտեմբերի 9-ին ԱԺ պատգամավոր է ընտրվել «Իմ քայլը» կուսակցությունների դաշինքի ընտրական ցուցակով, նույնանուն խմբակցության ղեկավարն էր։

The post Հայաստանն ԱՄՆ-ում նոր դեսպան ունի appeared first on CIVILNET.

#թոփ #լրահոս #հայաստան #քաղաքականություն #հրամանագիր #մակունց

«Քաղաքացիական պայմանագիրը» ընտրություններին կմասնակցի միայնակ․ Մակունց

«Քաղաքացիական պայմանագիր» կուսակցությունը դաշինքով չի մասնակցելու ընտրություններին, այլ մասնակցելու է որպես առանձին կուսակցություն։ Այս մասին այսօր՝ մայիսի 6-ին, Ազգային ժողովում լրագրողների հետ ճեպազրույցում ասաց «Իմ քայլը» խմբակցության ղեկավար Լիլիթ Մակունցը։

«Մայիսի 10-ից հետո անպայման կսկսենք ներկայացնել, թե ցուցակը ինչ տրամաբանությամբ կլինի, ովքեր ներգրավված կլինեն։ Կասեմ միայն, որ նոր մարդիկ կլինեն նախընտրական ցուցակում»,- հայտնեց նա։

Մակունցը տեղեկացրեց, որ «Քաղաքացիական պայմանագիրը» ընտրություններին կգնա «ապագա կա» կարգախոսով։

«Իմ քայլը» խմբակցության ղեկավարը մեկնաբանեց նաև առաջին Լևոն Տեր-Պետրոսյանի երեկվա հայտարարությունը․ «Որպես նախկինում առաջին նախագահի հետ քաղաքական թիմի մաս հանդիսացող մարդ, շարժման մաս հանդիսացող մարդ, որը հիմնված է եղել արժեքաբանական հիմքի վրա, ինձ մոտ, իհարկե, այդ հայտարարությունը տարակուսանք առաջացրել է»,- ասաց Մակունցը։

The post «Քաղաքացիական պայմանագիրը» ընտրություններին կմասնակցի միայնակ․ Մակունց appeared first on CIVILNET.

#արտահերթընտրություններ2021 #թոփ #լրահոս #հայաստան #քաղաքականություն #արտահերթընտրություններ #մակունց #քաղաքացիականպայմանագիր